ဒီကနေ့ မန္တလေးမှာ ကျွန်တော်မြင်ရ ကြားရသည်များကို ပြောပါဦးမယ် . . .
မနက်ပိုင်းက ဘုရားကြီးနားမှာ သံဃာတော်များ စီတန်းလမ်းလျှောက်ကာ တရားဒေသနာတော်များရွတ်ဖတ်ကြတယ်လို့ ကြားသိရပါတယ်. . .
ရှေ့ဆုံးမှ ဘုရားပုံတော်ကားကို ပင့်ဆောင်ပြီး သာသနာ့အလံ သုံးလက်၊ နောက်တွင် သပိတ်များကို မှောက်ကိုင်ဆောင်သော ရဟန်းသုံးပါး၊ နောက်မှ ရဟန်းတော်များ စီတန်းလို့ လိုက်ပါတယ်လို့ ကြားသိရပါတယ် . . .
ထိုနည်းတူ တောင်မြို့တွင်လည်း လျှောက်ကြကြောင်း သိရပါတယ်. . .
မွန်းလွဲ ၁၂း၄၅ ခန့်
အိမ်တော်ရာဘုရားအတွင်းသို့ အနီးပတ်ဝန်းကျင်ကျောင်းများမှ ရဟန်းတော်များ ၀င်ရောက်လာတာမြင်ခဲ့ရပါတယ်. . .
၁နာရီမှာတော့ အိမ်တော်ရာဘုရား ၁၄ခန်း ဓမ္မာရုံးကြီးမှစတင်လို့ သုံးပါးတွဲ အတွဲ ၂၀၀ခန့် စီတန်းလို့ ကြွချီလာပါတယ် . . .
ရှေ့ဆုံးမှ သာသနာ့အလံ ၃လက်၊ နောက်က သပိတ်အားမှောက်ကိုင်ဆောင်ထားသော ရဟန်းတော် သုံးပါး၊
နောက်က ၃ပါးတစ်တွဲနဲ့ အတွဲ ၂၀၀ခန့် စုစုပေါင်းအင်အား ၆၅၀ခန့် လမ်းလျှောက်ကြွချီလာတာကို ဖူးတွေ့ရပါတယ်. . .
သံဃာတော်များဟာ တရားဒေသနာတော်များရွတ်ဆိုပွားများကာ အေးချမ်းစွာ ကြွတော်မူကြပါတယ်. . .
လမ်းဘေးဝဲ၊ယာမှ ပြည်သူများသည်လည်း အေးချမ်းစွာ ဖူးမြော်ကြတာကို တွေ့ရပါတယ် . . .
၂၆လမ်းမှ ၈၄လမ်း
၈၄လမ်းမှ ၃၅လမ်း
၃၅လမ်းအတိုင်း အနောက်ဆင်းကာ အိမ်တော်ရာဘုရားဆီကို ပြန်လည်ကြွသွားတယ်လို့ မှန်းဆရပါတယ် . .
နောက်ဆုံး ၃၅လမ်းမှာဖူးရတော့ ၂နာရီ၁၅လောက်ရှိတာမို့ ကြာချိန် ၁နာရီခွဲလောက် လမ်းလျှောက်ကြတာလို့ ထင်ပါတယ် . . .
ဖိနပ်မပါ၊ လက်ကတော့ထိုး သင်္ကန်းဝတ်ရုံလို့ ကြည်ညိုဖွယ်သံဃာတော်များကို အအေးဘူးများ ကပ်လှူကြတာတွေ့ရပါတယ်ခင်ဗျာ . . .
ထို့အတူပဲ မြတောင်တိုက်ကလို့ ယူဆရတဲ့ သံဃာတော်များကိုလည်း ဈေးချိုနားမှာ ဖူးတွေ့ရပါတယ် . .
အိမ်တော်ရာမှ သံဃာတော်များနဲ့ ရှေ့ဆင့်နောက်ဆင့်ပါပဲ
တောင်ဘက်မှ တက်လာသော သံဃာတော် ၅၅၀ပါးခန့်ကို ၃ပါးစီတန်းလျက် ဖူးရပါတယ်. . .
ဘုရားကြီးနှင့်မျက်နှာချင်းဆိုင်ရှိ တောင်ပြင် ထီးလင်းတိုက်(ဟုထင်ပါသည်) ထဲသို့ သံဃာတော် အပါး၁၀၀ခန့် ၃ပါးစီ စီတန်းလို့ ၀င်သွားတာကို ဖူးတွေ့လိုက်ရပြန်တယ် . . .
သေချာတာတစ်ခုကတော့ သံဃာတော်များ သင်္ကန်းရုံပုံတူညီပါတယ်၊ ဖိနပ်မစီးတာ ၊ သုံးယောက်တန်းစီတာ၊ ရှေ့ဆုံးက သာသနာ့အလံပါတာ၊ သပိတ်များကို မှောက်လို့ကိုင်ဆောင်တာ . . .
တူညီကြပါတယ် ခင်ဗျာ . . .
လမ်းဘေးဝဲယာက လူများကလည်း သံဃာတော်များကို ကြည်ညိုစွာ ဖူးမြော်ကြတာတွေ့ရပါတယ် . . .
တချို့ အအေးဘူးများကပ်လှူကြပါတယ်ဗျာ . . .
ကျွန်တော် ဓာတ်ပုံများနှင့်တကွ တင်ချင်သော်လည်း
ဓာတ်ပုံမှာ ပါသွားမည့် သံဃာတော်များရဲ့ နောင်ရေးကို တွေးလို့ ဓာတ်ပုံမရိုက်ဖြစ်ခဲ့တော့ပါ . . .
ကနေ့ ကျွန်တော်တွေ့ခဲ့တဲ့ သံဃာတော်အရေအတွက်ကတော့ အားလုံး ၁၅၀၀ခန့်ရှိကြောင်းပါခင်ဗျာ . . .
No comments:
Post a Comment